Un 5 de outubro, de hai trinta anos, constituíase en Vigo a empresa Edicións Xerais de Galicia S.A. Transcorridas tres décadas daquel feito, a editorial publicou 3.200 titulos (tres mil en lingua galega) e vendeu máis de dez millóns de exemplares dun catálogo moi diversificado.
Dende o ano 1980 está especializada na edición de libros de texto en lingua galega, o que supón o 22% dos títulos do catálogo. Na actualidade, ten unha completa oferta de materiais didácticos para o ensino da lingua galega no ensino non universitario, que abrangue todos os cursos da Educación Infantil, Primaria e Secundaria.
A editorial mostrouse “moi orgullosa” por este labor realizado dende 1979 e animou a toda a sociedade a “impulsar” o seu labor “de normalización do libro galego”.
Xerais prepárase para lanzar os primeiros ebooks en galego, como parte dun proceso de normalización do noso sistema editorial, no que “temos moito camiño por percorrer”.
